سياسة الخصوصية

مين نحنا

haeifin تطبيق دفتر ديون وحسابات. هالسياسة بتشرح شو البيانات اللي بيتعامل معها التطبيق وموقع haeifin.com، وليش، ووين بتروح. المسؤول عن البيانات: فريق haeifin بسوريا. للتواصل: info@haeifin.com.

باختصار

• دفترك (الحسابات والحركات والصور) محفوظ على تلفونك بس، ونحن ما منشوفو.
• الحساب اختياري. إذا عملت حساب، منحفظ اللي بيلزم لتدخل وتشترك.
• المدير بيبعت سؤالك لمزوّد ذكاء اصطناعي ليجاوب، ومحادثاتك المحفوظة مشفّرة.
• ما في إعلانات، وما منبيع بيانات، وما في أدوات تحليل أو تتبّع جوّا التطبيق.

دفترك على تلفونك

الحسابات والحركات والديون والعملات وأسعار الصرف والملاحظات وصور الحركات محفوظة بقاعدة بيانات على جهازك. التطبيق بيشتغل كامل بلا إنترنت وبلا حساب، وهالبيانات ما بتوصل لسيرفرنا.

النسخة الاحتياطية ملف بيطلع عندك وإنت بتقرّر وين تحفظو. إذا حطيتلو كلمة سر، بيتشفّر (AES-256-GCM)، ونحن ما منقدر نفتحو ولا نرجّع كلمة السر.

إذا عملت حساب

الحساب بيلزم للاشتراك وللميزات الأونلاين. حسب طريقة الدخول منحفظ:

• Google: معرّف حسابك بـ Google، وإيميلك وإذا هو مؤكّد، واسمك وصورتك.
• رقم الموبايل: رقمك. رمز التأكيد بيوصلك برسالة SMS أو واتساب عن طريق مزوّد رسائل، ونحن منحفظ الرمز مشفّر (hash) لوقت قصير بس.
• الإيميل: إيميلك، وكلمة السر مشفّرة (hash) وما منقدر نقراها.
• الأجهزة والجلسات: نوع الجهاز وموديلو ونسخة التطبيق، وعنوان IP ومعلومات المتصفح أو التطبيق لكل جلسة دخول، لتشوف أجهزتك وتطلع منها.
• صورتك: إذا رفعت صورة، منصغّرها ومنحفظها على سيرفرنا.

المدير (الذكاء الاصطناعي)

لما تسأل المدير، سؤالك (كتابة أو صوت) بيروح من سيرفرنا لمزوّد ذكاء اصطناعي ليجاوب: Google Gemini أو OpenAI. مع السؤال منبعت آخر كم رسالة من المحادثة، وأسماء حساباتك وأنواعها، وعملات الدفتر، وتاريخ اليوم واللغة، لحتى يفهم عن مين عم تحكي. الأرصدة ما منبعتها، إلا بالمكالمة المباشرة لما تسأل عن رقم معيّن، وقتها بينبعت الرقم اللي سألت عنو بس.

منسجّل عدد الطلبات وكلفتها لنحسب الكريدت، مو كلامك ولا صوتك. إذا باقتك فيها حفظ المحادثات، بتنحفظ مشفّرة (AES-256-GCM) بمفتاح خاص إلك. المحادثة اللي بتحذفها بتروح عالسلة، والسلة بتنفضى لحالها بعد 30 يوم. وبتقدر تصدّر محادثاتك.

منستعمل واجهات المزوّدين البرمجية المدفوعة (API)، مش تطبيقاتهم العامة. مع OpenAI منطلب صراحةً ما تنحفظ الطلبات، وحسب شروط الـ API عند المزوّدين التنين، بيانات الطلبات ما بتنستعمل لتدريب نماذجهم.

الإشعارات

لنبعتلك تذكير أو خبر، التطبيق بيسجّل رمز إشعارات من Firebase Cloud Messaging، مع لغة التطبيق وبلدك ونسخة التطبيق ومنطقتك الزمنية، وحسابك إذا كنت مسجّل دخول. بتقدر توقف الإشعارات من إعدادات التلفون.

الاشتراك والدفع

الاشتراك بيصير عالواتساب: بتختار الباقة، منبعتلك طرق الدفع، ومنفعّل الباقة على حسابك. منحفظ الباقة والسعر وتاريخها وملاحظة. ما منحفظ أي معلومات بطاقة أو حساب بنكي. الترخيص بيتحقق منو التطبيق على تلفونك حتى بلا إنترنت.

أذونات التلفون

• جهات الاتصال: لتستورد أسماء وأرقام، بتنقرا على تلفونك بس، وما منكتب عليها.
• الروزنامة: اختيارية، لتنحط مواعيد الاستحقاقات بروزنامتك. على تلفونك بس.
• الكاميرا والصور: لصور الحركات والحسابات ولمسح QR. الصور بتضل على تلفونك (إلا صورتك الشخصية إذا رفعتها).
• الميكروفون: لتحكي المدير. الصوت بينبعت ليتفهّم، وما منحفظو.
• البصمة أو الوجه: لقفل التطبيق، وبيتحقق منها تلفونك نفسو.

شو ما منعملو أبداً

• ما منبيع بياناتك ولا منأجّرها.
• ما في إعلانات بالتطبيق.
• ما في أدوات تحليل أو تتبّع أو تقارير أعطال من طرف تالت جوّا التطبيق.
• ما منقفل دفترك إذا خلصت باقتك: القراءة والتصدير والنسخة الاحتياطية دايماً مفتوحين.

وين محفوظة وقديش

بيانات الحسابات على سيرفر خاص فينا عند netcup بألمانيا، وقاعدة البيانات بتاخد نسخة احتياطية كل ليلة وبتنحفظ 14 يوم.

• بيانات الحساب: لحتى تحذف حسابك.
• رموز التأكيد: دقائق.
• المحادثات المحفوظة: لحتى تحذفها (والسلة 30 يوم).
• النسخ الاحتياطية للسيرفر: 14 يوم.

حقوقك

بتقدر تشوف بياناتك وتصلّحها من التطبيق، وتصدّر دفترك ومحادثاتك، وتفك طرق الدخول، وتطلع من أي جهاز، وتحذف صورتك أو أي محادثة. ولحذف حسابك كامل: حذف الحساب. التطبيق مو موجّه للأطفال تحت 13 سنة.

هالموقع

موقع haeifin.com ما بيستعمل كوكيز للتتبّع ولا إعلانات، والخطوط والملفات كلها من سيرفرنا، فمتصفحك ما بيطلب شي من أي طرف تالت. منعدّ الزيارات بـ Umami، مركّب على سيرفرنا: بلا كوكيز، وبلا بيانات شخصية، وما بيحتفظ بعنوان IP تبعك.

التغييرات والتواصل

إذا تغيّرت هالسياسة منحدّثها هون مع التاريخ، وإذا كان التغيير كبير منخبّرك بالتطبيق. أسئلة؟ info@haeifin.com أو واتساب.